जत, : "आधी केले मग सांगितले" या उक्तीचे मूर्तिमंत उदाहरण देत, जत तालुक्यातील महसूल विभागाने अवयवदानाच्या बाबतीत एक क्रांतीकारी पाऊल उचलले आहे. तालुक्यातील तब्बल ११० अधिकारी आणि कर्मचाऱ्यांनी स्वेच्छेने अवयवदान करण्यासाठी नोंदणी केली आहे. महसूल विभागाच्या या सामूहिक आणि दूरदृष्टीच्या निर्णयामुळे अवयवदानाविषयी समाजात मोठी जनजागृती होणार असून, इतर विभागांनाही यातून प्रेरणा मिळेल अशी आशा व्यक्त केली जात आहे.
या स्तुत्य उपक्रमाची सुरुवात प्रांत अधिकारी श्री. अजयकुमार नष्टे आणि तहसीलदार श्री. प्रवीण धानोरकर यांच्या पुढाकाराने झाली. त्यांनी स्वतः अवयवदानाची नोंदणी करून आपल्या सहकाऱ्यांनाही यासाठी प्रेरित केले. त्यांच्या या आवाहनाला जत तालुक्यातील महसूल विभागातील निवासी नायब तहसीलदार श्री. पंडित कोळी, महसूल नायब तहसीलदार श्री. बाळासाहेब सवदे, संगायो नायब तहसीलदार श्री. आण्णासाहेब धोडमाळ, नायब तहसीलदार श्रीमती सुभद्रा कुंभार (उपविभागीय अधिकारी कार्यालय जत), निवडणूक नायब तहसीलदार श्री. मनोज मेंगारती, सहायक महसूल अधिकारी श्री. राहुल कोळी, सहायक महसूल अधिकारी श्रीमती हेमा संकपाळ यांच्यासह सर्व अधिकारी व कर्मचाऱ्यांनी उत्स्फूर्त प्रतिसाद दिला.
महसूल कर्मचारी संघटना अध्यक्ष श्री. सिदू आप्पा शिंदे (माजी सैनिक), ग्राम महसूल अधिकारी अध्यक्ष श्री. गुरव, चतुर्थ श्रेणी अध्यक्ष श्री. विक्रम हाताळे, आणि महसूल सेवक अध्यक्ष श्री. सुभाष कोळी व त्यांच्या सर्व पदाधिकारी आणि सदस्यांनीही या महत्त्वपूर्ण निर्णयात सक्रिय सहभाग नोंदवला. विशेष म्हणजे, केवळ महसूल कर्मचारीच नव्हे, तर तालुक्यातील सर्व रास्त भाव धान्य दुकानदार आणि सर्व संगणक ऑपरेटर यांनीही अवयवदानासाठी नोंदणी करून या सामाजिक कार्यात आपला वाटा उचलला आहे.
अवयवदानाचे महत्त्व:
अवयवदान हे मानवी जीवनातील एक अत्यंत पवित्र आणि उदात्त दान मानले जाते. मृत्यूनंतर एखाद्या व्यक्तीचे अवयव, जसे की डोळे, मूत्रपिंड, हृदय, यकृत, फुफ्फुसे, त्वचा इत्यादी दान केल्याने गंभीर आजारी असलेल्या किंवा अपघातात अवयव गमावलेल्या अनेक रुग्णांना नवजीवन मिळू शकते. एका व्यक्तीच्या अवयवदानामुळे किमान आठ व्यक्तींना जीवनदान मिळण्याची शक्यता असते. यामुळे केवळ रुग्णाचे प्राण वाचतात असे नाही, तर त्यांच्या कुटुंबांनाही मोठा आधार मिळतो. अवयवदान हे वैद्यकीय क्षेत्रात एक वरदान ठरले आहे.
जत महसूल विभागाने घेतलेल्या या चांगल्या निर्णयाचे सर्वत्र अभिनंदन होत असून, त्यांच्या या कार्यामुळे समाजात अवयवदानाविषयी सकारात्मक संदेश जाईल आणि अधिकाधिक नागरिक या मानवतावादी कार्यात सहभागी होण्यास प्रेरित होतील अशी अपेक्षा आहे.
0 टिप्पण्या